Regionlarda fəaliyyət göstərən ictimai birliklərə dövlət dəstəyi artırılmalıdır - komitə sədri
Milli Məclisin deputatı Fazil Mustafa regionlarda fəaliyyət göstərən ictimai birliklərin maliyyə və təşkilati imkanlarının genişləndirilməsini təklif edib.
O, vətəndaş cəmiyyətinə ayrılan vəsaitlərin bölgüsü və əlçatanlığı ilə yanaşı, maliyyələşdirilən layihələrin nəticələrinin də əsas meyar kimi götürülməli olduğunu bildirib.
Deputat 2027-ci ilin dövlət büdcəsi layihəsinin müzakirəsi zamanı çıxışında vətəndaş cəmiyyəti institutlarının dövlət proqramlarının həyata keçirilməsində mühüm rol oynadığını vurğulayıb.
Onun sözlərinə görə, siyasi partiyalara dəstək məqsədilə növbəti il də 6 milyon manat vəsait ayrılır. Bu maliyyələşmə partiyaların özünütəşkil və fəaliyyət imkanlarının gücləndirilməsi baxımından əhəmiyyətlidir.
Fazil Mustafa bildirib ki, 2027-ci ilin büdcə layihəsində yaradıcı ittifaqlar, cəmiyyətlər və dini tədbirlər üçün 22,8 milyon manat nəzərdə tutulub. Bu göstərici 2026-cı ilin dövlət büdcəsindəki məbləğlə eynidir.
Deputat həmkarlar ittifaqlarının sosial tərəfdaşlıq sistemində rolunun artırılmasının vacibliyini də qeyd edib. O bildirib ki, son illərdə həmkarlar ittifaqlarının fəaliyyətində canlanma müşahidə olunur, sanatoriya-turizm komplekslərinin yenidən təmir edilərək istifadəyə verilməsi müsbət tendensiyadır.
Deputat dini icmalara dövlət dəstəyinin yalnız təşkilati ehtiyacların qarşılanması ilə məhdudlaşmamalı olduğunu bildirib.
Deputat dövlət dəstəyi mexanizmlərində təşkilatların real fəaliyyəti, ictimai təsir imkanları, hesabatlılığı və həyata keçirdikləri layihələrin nəticələrinin əsas götürülməsini təklif edib.
O, ictimai birliklərə və dini qurumlara yönəldilən dövlət vəsaitlərinin bölgüsü və nəticələri barədə parlamentə və ictimaiyyətə daha əhatəli məlumat verilməsinin vacibliyini vurğulayıb.
Mənbə: anews.az
