Azərbaycan və Böyük Britaniya arasında Strateji Tərəfdaşlıq haqqında birgə bəyannamə imzalanıb
Azərbaycan və Böyük Britaniya arasında münasibətlər strateji tərəfdaşlıq səviyyəsinə yüksəldilib.
Bu barədə Azərbaycan və Böyük Britaniya arasında Strateji Tərəfdaşlıq haqqında birgə bəyannamədə qeyd olunub.
Sənədi noyabrın 12-də İrlandiyanın paytaxtı Dublində Azərbaycan Prezidenti İlham Əliyev və Böyük Britaniyanın Baş naziri Endi Börnhem imzalayıblar.
Bəyannamə müdafiə və təhlükəsizlik, ticarət, investisiya və iqtisadi artım, eləcə də təhsil və innovasiya sahələrində əməkdaşlığın genişləndirilməsini nəzərdə tutur.
Sənədə əsasən, tərəflər müdafiə sənayesi, hərbi təlim, hüquq-mühafizə, sərhəd idarəçiliyi və məhkəmə-hüquq sahələrində əməkdaşlığı gücləndirmək niyyətindədirlər.
İqtisadi sahədə bərpa olunan enerji, infrastruktur, nəqliyyat, logistika və maliyyə bazarları üzrə tərəfdaşlığın inkişafı, həmçinin Orta Dəhlizin dəstəklənməsi prioritet istiqamətlər kimi müəyyən edilib.
Bəyannamədə Azərbaycanın və Böyük Britaniyanın enerji təhlükəsizliyi, təmiz enerji keçidi, yaşıl maliyyələşdirmə və aşağı karbonlu texnologiyalar sahəsində əməkdaşlığı genişləndirmək niyyəti də əksini tapıb.
Tərəflər, həmçinin ali təhsil, peşə hazırlığı, süni intellekt, rəqəmsal idarəetmə, elmi tədqiqat və innovasiya sahələrində əlaqələri inkişaf etdirməyi planlaşdırırlar.
Sənədə əsasən, Strateji Tərəfdaşlıq çərçivəsində əldə olunan irəliləyişləri qiymətləndirmək və gələcək əməkdaşlıq prioritetlərini müəyyənləşdirmək üçün hər il müvafiq görüşlər keçiriləcək.
Bəyannamə 2026-cı il noyabrın 12-də Dublində Azərbaycan və ingilis dillərində imzalanıb.
Mənbə: anews.az
