Azərbaycanda taxıl yığımında 6,2% artım olub

Azərbaycanda payızlıq və yazlıq dənli və dənli-paxlalı bitkilər üzrə nəzərdə tutulan sahələrin 93%-də biçin aparılıb və 3 milyon 131,9 min ton məhsul yığılıb. Bu barədə Dövlət Statistika Komitəsindən bildirilib. 

Biçilməsi nəzərdə tutulan 994,9 min hektar sahənin 925,1 min hektarı artıq biçilib. Orta məhsuldarlıq hər hektardan 33,9 sentner təşkil edib.

Yığılan məhsulun 1 milyon 561,2 min tonu arpanın, 1 milyon 534,8 min tonu buğdanın, 35,9 min tonu isə digər dənli və dənli-paxlalı bitkilərin payına düşüb.

Gülnar Nazimqızı 

Ötən ilin müvafiq dövrü ilə müqayisədə ümumi taxıl yığımı 6,2% artıb. Artım əsasən arpa istehsalının 15,9% yüksəlməsi ilə bağlıdır. Buğda yığımı isə 2,1% azalıb.

Buğda üzrə məhsul yığımının azalmasına biçin aparılan sahənin əvvəlki illə müqayisədə kiçilməsi təsir edib. Belə ki, avqustun 3-dək 420,7 min hektar buğda sahəsi biçilib. 2025-ci ilin avqustun 5-nə bu göstərici 466,9 min hektar olub. Bununla yanaşı, buğdanın məhsuldarlığı artıb: hər hektardan orta məhsuldarlıq 33,6 sentnerdən 36,5 sentnerə yüksəlib.

Biçin 13 şəhər və rayonda tam başa çatıb, digər 30 rayonda isə nəzərdə tutulan sahələrin 90%-dən çoxunda işlər görülüb.

Ən çox taxıl məhsulu Cəlilabad rayonunda – 298,8 min ton, Şəkidə – 186,7 min ton, Ağcabədidə – 167,2 min ton, Füzulidə – 141,1 min ton, Kürdəmirdə – 127,5 min ton və Neftçalada – 109,6 min ton toplanıb.

Məhsuldarlıq baxımından isə Ağcabədi hər hektardan 45,5 sentnerlə ilk sıradadır. Onu Tovuz (45,3 sentner), Bərdə (45,2 sentner) və Sabirabad (43,9 sentner) rayonları izləyir.

Gülnar Nazimqızı 

Mənbə: anews.az