Azərbaycan şərabının tıxacından "Armenian Wine" yazısı çıxdı

Azərbaycan istehsalı olan "Xankəndi Xindoqnı" markalı qırmızı şərabın şüşəsindən çıxarılan tıxacın üzərində "Armenian Wine" (Erməni şərabı) yazısı əks olunub.

BAKU.WS xəbər verir ki, bu barədə Oxu.Az-a məlumat daxil olub.

Sözügedən məsələ Azərbaycan şərabının hazırlanmasında erməni məhsullarının istifadəsi ilə bağlı şübhə yaradıb.

Məlumat üçün bildirək ki, xindoqnı Qarabağa məxsus qədim, yerli qırmızı texniki üzüm sortudur. Bu üzümdən əsasən qırmızı şərab istehsalında istifadə olunur.

Qeyd edək ki, məsələ ilə bağlı aidiyyəti quruma sorğu ünvanlanıb.

Məsələ ilə əlaqədar BAKU.WS-ə açıqlama verən sözügedən zavodun rəhbərliyi bildirib ki, şüşələrin qablaşmasının arxasındakı etiket məlumatlarına əsasən, qırmızı quru şərab növü olan "Xankəndi - 2017" Azərbaycanın Qarabağ bölgəsində, Xankəndi şəhərində yerləşən keçmiş "GİRS" şərab zavodunda istehsal edilib.

2017-ci ilin məhsulu olan bu şərab xüsusi olaraq həmin ərazidə yetişdirilən Xındoqnı üzüm növünün emalından əldə olunub.

Etiketdə həmçinin istehsalın Əmlak Məsələləri Dövlət Xidməti ilə bağlanmış 19.08.2024 tarixli DİYYM 08/24/003 nömrəli müqavilə əsasında həyata keçirildiyi, məhsulun satış təmsilçisinin isə "Gold Alko" MMC (VÖEN: 1102623721) olduğu qeyd edilib.

Qalereya

Mənbə: baku.ws