Nazirlik rəsmisi ötən il dəstək olunan uşaqların sayını açıqlayıb
2025-ci il ərzində Sosial Xidmətlər Agentliyinin sosial xidmət müəssisələrində 886, sosial xidmət mərkəzlərində isə 622 uşaq müxtəlif sosial xidmətlərlə təmin edilib. Bunu nazirliyin Sosial təminat siyasəti şöbəsinin müdiri Babək Hüseynov Milli Məcisdə "uşaq hüquqları haqqında" qanuna münasibət bildirərkən deyib.
Layihələr çərçivəsində 30 günərzi qayğı mərkəzi fəaliyyət göstərib və bu mərkəzlər vasitəsilə 1 198 uşağa sosial xidmət göstərilib.
Valideyn himayəsindən məhrum olmuş uşaqların ailə mühitində böyüməsi və inkişafını təmin etmək məqsədilə 2025-ci il ərzində 40 uşaq himayədar ailəyə, 149 uşaq övladlığa verilib.
Reinteqrasiya tədbirləri nəticəsində 275 uşağın müəssisələrə düşməsinin qarşısı alınmış, 176 uşaq isə müəssisələrdən ailələrinə qaytarılmışdır.
Nazirlik tərəfindən 97 əlilliyi olan uşağın sanatoriya-kurort putyovkaları ilə təminatı həyata keçirilib.
Ötən il ərzində 44 200 nəfər əlilliyi olan uşaq, 67 000 nəfər ailə başçısını itirmiş uşaq, 13 200 nəfər beşdən çox uşağı olan qadınların uşağı, 3 200 nəfər aztəminatlı ailələrin 1 yaşınadək uşağı, 647 nəfər müddətli həqiqi hərbi xidmət hərbi qulluqçularının uşağı, həmçinin 42 nəfər övladlığa götürülmüş, 47 nəfər isə himayədar ailəyə verilmiş uşaq olmaqla ümumilikdə 128 mindən çox uşaq Nazirlik tərəfindən sosial ödənişlərlə təmin olunub.
Ümumilikdə, 128 mindən çox uşaq Nazirlik tərəfindən müxtəlif sosial ödənişlərlə təmin olunur. Həmçinin, 179 618 aztəminatlı ailələrdən olan uşağa ünvanlı dövlət sosial yardımı ödənişi həyata keçirilir.
Gülnar Nazimqızı
