Pakistanın keçmiş baş naziri İmran Xan xəstəxanada müayinədən sonra həbsxanaya qaytarılıb
Pakistanın keçmiş baş naziri İmran Xan tibbi müayinədən keçirildikdən sonra Ravalpindidəki Adiala həbsxanasına qaytarılıb. Bu barədə onun Pakistan Təhriki-İnsaf partiyasının sözçüsü bildirib.
73 yaşlı Xan cümə günü səhər saatlarında tibbi müayinə üçün İslamabad xəstəxanasına aparılıb. Bir neçə saat xəstəxanada qaldıqdan sonra yenidən həbsxanaya göndərilib.
Xan 2023-cü ilin avqustundan həbsdədir. O, barəsində açılan cinayət işlərinin siyasi motivli olduğunu bildirir. Pakistan hökuməti isə bu iddiaları rədd edir.
Xanın vəkilləri həbsdə olduğu müddətdə onun səhhətinin, xüsusilə sağ gözündə görmə qabiliyyətinin əhəmiyyətli dərəcədə pisləşdiyini bildirirlər. Hökumətin məlumatına görə isə indiyədək aparılan tibbi müayinələr təcili və ya xüsusi müalicə tələb edən hər hansı xəstəlik və ya vəziyyət aşkar etməyib.
Pakistan Ali Məhkəməsi çərşənbə axşamı hakimiyyət orqanlarına Xanın 48 saat ərzində İslamabadakı Şifa Beynəlxalq Xəstəxanasına köçürülməsini və tibbi komitə tərəfindən müayinə olunmasını təmin etməyi tapşırıb. Komitəyə Xanın şəxsi həkiminin də daxil edilməsi nəzərdə tutulub.
Gülnar
Mənbə: anews.az
